الشاعر محمد أحمد السيد (محمدالنورس)

شاعر غنائي .  كلماته تأسر القلوب وتهز المشاعر نشرت أعماله بالجرائد والمجلات

المصرية . نظمت له اذاعة القاهرة و اذاعة الشباب والرياضة واذاعة جنوب الصعيد العديد

من اللقاءات الاذاعية مع كبار الشعراء وكتاب الاغنية والنقاد ومن قصائده

----------------------------------------

1 - مواسم النورس

زيَك أنا ..

           لابيت  ..

                     لابندقية  ..

                                لاوطن ..

لكن باطير ..

والموت ياصاحبى مش موت جسد

لكن .. ضمير

وكتير انا بافرد جناحى لمنتهاه

وايش يعمل الطيران لقلب أسير

وكتير أنا وقلبى وحبيبتي
لونك

                    ضميرك

                                           غنوتك

                              خوفك                                 

                   حنينك

                                          غربتك

زيَك أنا ..

مرسوم على وش الخلايق والسكك

..   ..  ..

زيَك أنا ..

والليل قدر

والبحر ساب الشط

واختار السفر

يابحر سافِر

وانزوى ف حضن الطريق

واكتب على قلب الندى

 كلمة مطر

..   ..  ..

زيَك انا

شايل علي جناحي

الزمن والريح

كاتب علي جراحي

وطن مجاريح

وصريح ..

لكني ف الحشا مهزوم

معلوم

أنا وانت

قتيل .. وجريح

..  ..  ..

زيَك أنا

ولامانيش زيَك

ولاانت زيي ف الهوا

طاير لوحدك

مكسور جناحك

والشعور مكسور

والسور ..

مابين قلبك .. وبين قلبك

---------------------------------------------

2- الف ديوان كلام

خلاص هونا

وسْكْنت فينا احزانا

وعشنا براحنا ف جراحنا

وليه افراحنا تهجرنا

..   ..   ..   ..

ياحبيبتي عايش

زي مش عايش ..

انا

تعبان قوي

مٌره الحياة جدا ..

هنا

خايف من التصريح

جريح

ومااقدر ع الغنا

راجعة الليالي البرد

اهي لينا تسكنا

..   ..   ..   ..

سَافِر ياعمري جوا مني

خلاص وموت

ايه معني الف ديوان كلام .. ؟

وقت السكوت

بصرخ ف حضنك

بعشقك ..

ضلة وبيوت

وشطوط بتنده لينا

ف كل اماكنا

--------------------------------

3- مستباحة

انا بسألك

والرد عندك .. والجواب

انا كنت قادر أجرحك

واقفل ف وشك ألف باب

لكني لحظة لما ها اقسي

وهاجرحك

قلبي انا هو الضحية ..

ف الحساب

..    ..    ..

كان الضباب

سحابة سوده فوق عينيا

ماشفتكيش

ايوه صحيح

طعم الخيانة فوق شفايفي

ماحستوش

دلوقتي بس .. القلب حس

الحب ف عيون الخيانة

يادوب سراب

..    ..    ..

عندك جواب ... ؟

ودموع تبرر ..

 ليكي خسة موقفك

لازم أكيد

الدم يجري جوه منك

يلعنك ...

مُرة الصراحة

يامستباحة

الكدب ف دموع الإهانة

أكيد عذاب